I'am back my dear's

Exams are over

so i'am back with this new post

about

" للكبار فقط "

المفروض , المفروض يعني اني اكمله انجلش بس للاسف

لما احب اتعصب في الكلام باتكلم ارابيك

المهم

انا بصراحه في موضوع معصبني اوي اوي

للكبار فقط , ليه يعني

ليه في حاجتين

اولاً : المشاهد اللااخلاقيه و العاريه في الافلام الهابطه بزياده

انا بصراحه بينرفزني اوي وجودها في افلامنا و خاصة تدفقها في افلامنا في الاونه الاخيره

يا جماعه ليه يعني هتقولي علشان الفيلم يمشي و يحقق مكاسب

زي الفيلم الحقير اللي اسمه " حين ميسره " يبقى قلته احسن

بصراحه فيلم في غاية الوقاحه و قلة الادب و في نفس الوقت ملوش اي لزمه

يمكن بيتكلم عن العشوائيات و اطفال الشوارع , بس صدقوني محدش دخله بهدف استكشافه

لا خاااااااااالص , ده عشان مشاهدة و لقطاته المخله

في حين ان كان معاه افلام راقيه زي الجزيره و خارج عن القانون

يبقى ليه اللجان السينيمائيه بتسمح للافلام دي تنزل ؟

بس هقول ايه اذا كان وزير الاعلام قال على الحجاب تخلف

ثانياً : ليه اذا الفيلم كان كويس , تخربه بمشاهد مخله ؟

فيلم زي هي فوضه , فيلم راقي و جميل , لكن ليه المشاهد اللي ملهاش لزمه دي

طيب بلاش ده لو من زمان شويه

الكباريه - يمكن ناس تستغرب من رايي او تهاجمه

بس صدقوني فيلم , من رايي ان هو جاب مصر كلها من خلال الكباريه ده

من رجال بيمثلو الاستقامه او ناس مرغمه انها تدخل موجة الفوضى دي او الناس اللي اتذلت

انا مكنتش عايز اكتب بوست كامل في الفيلم ده بس صدقوني الفيلم ده جميل و فكره عالي

بس فيه لقطات مش محبوبه

اجي لفيلم زي الريس عمر حرب

يمكن يكون فيلم كويس , بس الممثله اللي تدعى غاده عبد الرازق دي و قحه جداً

و انا اقسمت اني مشفش فيلم هي فيه , او حتى المشاهد بتاعتها اذا كانت فيها اذا اضطريت اشوف الفيلم

:::: شوية أراء جانبيه :::::

اولاً : خالد الصاوي

ممثل راقي في تنوع ادواره و

خصوصاً في دوره في يعقوبيان رغم معارضتي لدوره بس انه يعمله معناها ان هو ممثل عالي بجد

و من ثم في الكباريه اللي عمل فيه مغني شعبي ببراعه بصراحه و اين وعدك ليا

ثانياً : خالد صالح

مهما كان هو ممثل فوق الرائع و راقي جداً في ادائه

بس هو بفكر غربي عايز يبقى البتشينو , و ده يتعارض مع الموضوع اللي انا بانتقده

للاسف افلامه بقت فيها مشاهد مخله كتير

يا ريت يرجع خالد صالح المصري مش الغربي و السينما تكسبه في الجانب الجميل و النظيف

ثالثاً : الوسط الفني

من غير زعل , و من غير ما حد يفهمني صح

و سط بصراحه هي كلمه و عايز اقولها , انه وسط غير محترم

بصراحه انا مشفتش في الوسط ده ناس محترمه غير ناس قليله تتعد على الصوابع

مغيرتهاش تقلبات السينما

افتكر منهم ( السقا و هنيدي و سعد ) يمكن دول اللي ادخل افلامهم و انا مطمن

رابعاً : دخلاء السينما

يا جماعه مش كل مطرب لازم يعمل فيلم و مش كل رياضي يعتزل يمثل

بصراحه فيلم زي عمر و سلمى , انا عن نفسي اتمنى ان تامر يبعد عن السينما خالص

لان حتى في الفيلم ده جاب عناصر كتير تمشيهوله

و كمان عمرو اللي انا من عشاقه , يا مان محدش بيعمل فيلم او مسلسل عن نفسه

الناس هي اللي من حبها تعمله , و كفايه ظهور على الشاشات بتضيع جمال اغانيك بافلامك الهابطه بصراحه

عامر منيب : متعملش افلام تاني ارجوك

كــــــــــــــــــــــــلمه أخيـــــــــــرة

يا جماعه الظاهرة دي لازم تنتهي فوراً و باسرع وقت

ده انا مش عارف لما احب ادخل فيلم مع بابا و ماما و لا اختي

ادخل ايه يعني , اذا كان الكل بقى كده

مش كفايه الافلام الاجنبي اللي لازم احملها و اقطع منها المشاهد دي قبل ما احطها في البيت

ارجع و افتكر كلام الممثله نهلة سلامه اللي انا بأحترمها اوي , و اللي هي جميله اوي

بأدبها ومن غير اغراء او غيره

قالت : زمان مكنش في المشاهد دي و مكناش محتاجنها

اصل هيفيدك بايه المشهد ده و لا حاجه فعلاً

فيها ايه زمان لما كان بييجي مكانها برق و رعد او متجيش اساساً ؟

يا جماعه يمكن يكون في حاجات مش عجباكم في البوست بس ساحة الحوار مفتوحه

بس جوهر الحوار اللي هو ( لا للكبار فقط ) عمره ما هيتغير في نظري بصراحه

و شكراً لحسن استماعكم