السلام عليكم ورحمة الله و بركاته
وصلني تاج قنبلة من مش قادره
.
لو قالولك اختارعصر من عصور مصر عشان تعيش فيه تختاراى عصر وفى عهد اى حاكم واشمعنى؟
ههههههه , انا معرفش تاريخ مصر بالظبط , بس انا اختار عصر كان فيه
قوة لمصر و استقرار داخلي و ده لان اكيد ابقى متريش في الحاله دي
.
.
اول اولوية فى حياتك عيلتك ولا شغلك ولا اصحابك؟
عيلتي عيلتي عيلتي , انا ميفرقش معايا اي حاجه غير ربنا و عيلتي
و مانشستر يونايتد و اسبانيا , و الباقي ملوش لزمه
طبعاً باستثناء اصحابي اللي فعلاً اصحابي ( الحقيقيين ) و بس
.
.
ايه اكتر حاجة بتحبها فى رمضان ؟
ان انت بتحس ان ربنا فضالك وقت علشان تعبده , من تصغير محاضرات
و من تغيير نظام نوم و غير كده و كده
بيضفي الخير الشهر ده فعلاً و بيأدب النفس كويس جداً
و ده انا بحبه في رمضان , انا لو في كل رمضان اتخلصت من عيب عندي
ابقى ان شاء الله حاجه انتي وسوسه anti waswasa
.
.
اوصف ليا اجمل فطار ممكن تفطره؟
كل حاجه على فكره , و اجمل حاجه التمر اللي تاكله على الريق و قمر الدين و اديها يا معلم
بعد كده
.
.
لو انت حاكم على مجموعة من الافراد حتكون عادل؟ طب حتعمل ايه عشان تتأكد انك حاكم عادل؟
انا , طبعاً على قد ما اقدر , لان انا لو حاكم يعني انا الكبير و الكبير ميخافش من الصغيرين
اعرف ازاي , سؤال وجيه بس انا مش لاقي وجيه دلوقتي
بس اكيد اذا انا عملت اللي عليا و اللي يرضي ضميري بجد
يبقى اي خلل مش هيكون متعمد , و بكده انا اعتقد يبقى عملت اللي عليا
.
.
اللى بيبوظ الحكام ..نفسهم ولا الشعب ولا الحاشية المقربة؟؟
نفسه 100 % , لو واحد كويس عمره ما يبوظ , لكن احياناً
التكبر و الغرور و حاجات تانيه
.
.
مين اكتر اعلامى مصرى بتحترمه؟؟
حمدي قنديل ( بس معلش معرفش حد تاني غير شوبير ) مش متابع قنوات مصريه
.
.
قريت ديوان عمر مصطفى صاحب بلوج تجربة" اسباب وجيهة للفرح" عن دار ملامح ولا لسه؟؟
لا و الله , بس ده نزل شريط باين صح ؟
.
.
لو ممكن تشتغل شغلانة تانية غير اللى انت بتشتغلهااو كنت بتشتغلها كنت تتمنى تبقى ايه؟؟
شغلانه تانيه
كتير
بس معلش دي فرصتي بقى و بصراحه
1 - سواق تاكسي في مطروح ( رايق و مضايق ) و الشوارع فاضيه
2 - صاحب سيبر و غرزة بلاي ستيشن
3 - لاعب كورة سلة
.
.
ايه تانى بلد تتمنى تعيش فيها بعد مصر؟؟
اسبانيا , قبل مصر كمان
.
.
اوصف ليا ترتيبات اجمل فرح ممكن تحضره؟؟
العريس و العروسة كانوا راكبين عربيه و هما جايين خبطوا في لوري
و ماتوا ( يا عيني ) و بكده انا هروح تاني
لأني مبحبش الرسميات خاااااااالص , وخصوصاً اني البس جزمة
.
.
بتراعى كلام الناس والقيل والقال؟ لو اه او لو لا قولى ليه؟
انا بديه اهمية بسيطه
لان اذا حد سأل عليك هيسأل الناس دي
و طبعاً ابو العروسه ( و انا عايز اتجوز في السريع بسرعه ) مش كده و لا ايه
.
.
صحيت من النوم مالقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنة حتبقى سعيد؟
لا هفضل مصطفى مش سعيد ( و ابقى سعيد رمسيس ) لا
انا هنام تاني يمكن اصحى الاقي نفسي رجعت تاني
بس لو فضلت برضه
هروح اصطاد بالرمح , نفسي اعملها
.
.
السعادة هى؟؟
ان يكون المخ خالي من الهموم و بجانبك صديق يسمع مني و يسمعني
و يا ريت تكون ماما طبعاً
.
.
عندك امل ؟ اسبابك ؟
طبعاً طبعاً , علشان يبقى عندي هدف اعيش علشان احققه
.
.
لما تحب تهرب من كل شىء بتروح فين؟؟
mp3 ده في ودني
و امشي لحد اقرب محافظه و ارجع تاني
.
.
امتى اول مرة اخدت فيها نفس طويل كده وقلت بينك وبين نفسك ياااااه انا فعلا كبرت؟؟
لما عرفت من سؤالك اني كبرت
.
.
لما بتعمل عمل خيرى بيكون ايه هو دافعك الاول؟؟
اخد ثوابي و بيصعب عليا اللي محتاج مساعده انا اقدر اعملهالوا
.
.
بتشرب سجاير؟لو الاجابة اه ايه شعورك لو شفت ست بتشرب سجاير وليه؟
الحمد لله رب العالمين ..لا
أول مرة شفت ست بتشرب سجاير , كانت واحده بتبيع حاجه في الشارع و كانت بتشربها
ايه بمزاج , و طبعاً في التلفزيون شفت كتيييييير
بتعرف ايدك اليمين من الشمال ازاى؟
متعلمه ( هو ده سؤال بجد ؟ ) يا رايق
.
.
ايه اكتر اله موسيقية بتحبها؟
الكمان و الاكسليفون و كمان الطبله ( على فكرة فعلاً جميلة جداً ) و العنب العنب العنب
.
.
فى رأيك ليه الذوق والنخوة اتعدموا؟
عشان اتعدم الأخلاق والدين والتمسك بالمباديئ
.
.
ايه الحاجة اللى لو حصلتلك تبقى سعيد قوى؟
اني اتخرج من الكليه دي و اخلص بقى
.
.
تختار يبقى عندك ارض زراعية ولا اجنص عربيات ولا كام عمارة ولا فلوس فى البنك؟
ارض زراعية : لأ , مش عايز دبان
اجنص : لأ , مش عايز دوشه
فلوس في البنك : ايوة , بس بتمن اللي الاتنين اللي فاتوا , معلش حقي , ههههه
.
.
البحر ولا النيل؟؟؟
البحر , متجدد على طول
.
.
مركب ولا طيارة؟
طيارة اكيد , املك العالم كله
.
.
عاقل ولا مجنون؟
انا بعمل اللي انا عايزه ( شايفه صح ) بس
اصحابي قالولي انت مجنون
.
.
تقرا كتاب ولا تتفرج على فيلم؟
الفيلم , تمثيل المشهد ليه سحره بكل تاكيد
..
بتمرر التاج لمين؟
شباب روش طحن
princess dodo
سما
emy
معلش مش نايم و مش فاكر غير دول
و تصبحوا على خير
