DoMaLaYs

بسم الله الرحمن الرحيم بصراحه انا عارف اني اتاخرت اوي في الكتابة في المدونة بس اسباب غصب عني و الله و انا اشكر كل اللي سأل عليا و انا غايب بجد بشكرة من كل قلبي , لانكم حسستوني اني متنستش و لسه في الاذهان على العموم انا قعدت افكر اكتب في ايه في ايه قلت النهارده اكتب في كله و ابقى بتاع كله نبدأ بقى اولاً : المولد النبوي الشريف و تزامنه مع عيد الام بصراحه في حاجات كتير في مصر الواحد مكانش حسسها او عارفها يوم الخميس , و ده يوم المولد النبوي الشريف لاعظم انسان اتخلق سيدنا محمد ( صلى الله عليه و سلم ) , و الجميل في اليوم ده او اللي زاده جمال , اني كنت في اسكندرية و لزيادة الدقه في بيت جدتي صدقوني مش قادر اوصفلكم قد ايه كان الاحتفال جميل بالمولد النبوي من عرايس الولد اينعم طعمها وحش بس شكلها حلو مع انه لون واحد , و لون مبحبوش بس بجد من اولاد خالاتي و بناتهم اللي مسكوها انا نفسي مسكت واحده بس الفرحه بجد كان ليها طعم معشتوش قبل كده خاااااااااااالص و الاجمل ان اليوم اللي بعده كان عيد لاجمل انسانه هتشوفها طول ما انت عايش , و هي ماما و كل سنة و انتي طيبه يا مامتي و بعوده الايام بس بجد كانوا يومين اخر جمال و اللي زودهم اني اول مرة اعيشهم في البيت و مع الكبار و احس اني دخلت موود الراجل الموزون الكبير , الرسمي بمعنى اصح بس بجد يومين بعيد تالت في السنة دي ثانياً : الطقس و تقلبات ما بين الشتاء و الصيف بصراحه , الجو اتقلب بطريقه وحشه اوي , و بزياده اوي اوي ربنا ما يوريكم حر اسيوط الرائع اللي يحسسك انك في عطارد و لا الشمس اللي كانها في الشارع اللي ورانا , ده انا بقيت شبه دينزل واشنطن بسببها و فوق كده و كده الصيف اللي حضرته جاي شهر مارس امال هنعمل ايه في شهر سبتمبر هنعمل ايه ؟ لا و الزياده فوق ده و ده , مفيش اجازات يعني هتشوي هنا حلو اوي ثالثاً : الدراسه و تعقيدها في التيرم الحالي بصراحه مش عارف اقول ايه , بس التيرم ده لسه مفتحتش فيه حاجه بس كل ما اجي اذاكر , الاقي حاجه تشغلني و كاني مستني حاجه اتعلق بيها بس لأ , لاوم اذاكر , بس محدش عنده حاجه تحببك في المذاكرة , حتى لو حاجه بسيطه يمكن تجيب فايده معايا رابعاً : الحياة لها ابتسامه بطعم خاص و جمل يا جماعه مش هقول غير اني صححت شوية حاجات غلط بس صدقوني الحاجات دي حتى لو صغيرة هتحس بالفرق لما تسيبها يعني اقولكم على حاجه , انا مسكت غرفتي و ظبطتها و روقتها تمام حسيت براحه نفسيه كبيرة و الاهم من كل اللي فات الصلاة يا جماعه , و الله هتحس ان في حاجه جميلة بتعملها في حياتك و هيبقى ليك عين و انت بتدعي لربنا او مستني منه حاجه بجد صلح في نفسك الحاجات اللي انت شايفها غلط حتى لو كانت تافهه و هتلاقي الحياة بقت جميله خامساً : الرياضه شويه بقى بصراحه في قضايا رياضيه كتيييييير اليومين دول بس الخصها في كام راي على السريع اراجونيس , تحذير شديد اللهجة ليك , اذا راؤول جونزاليس مرجعش للمنتخب انا مش هقدر اسيب تشجيع الماتادورز للاسف لاني بحبهم اوي بس هدعي عليك حتى و انت ماشي , يا حضري , انت هتفضل كبير في عيني و صدقني في ناس متأثرتش بموضوعك , و انت لسه السد العالي كفايه انك رجعتلنا تاني , بس ليك حق انك عايز تضمن مستقبلك بولتون واندرز و الماكبايس , مش متخيل الدوري الانجليزي من غيركم , ارجوكم حاولوا تحاربوا شبح الهبوط بكل الاشكال بس ابقوا في الدوري علشان خاطري فيدرير , انا فرحان فيك لان كنت بحس انك مغرور , و انت يا نادال , مش عارف ليه حظك وحش يا ابني بس ان شاء الله ربنا يكرمك انت و فيش اللي شكله ليه مستقبل في التنس سادساً و اخيراً : الموسيقى الموسيقى حاجه جميله بس بجد في كلمات تخليك تفرح و تتبسط اوي و في كلام يحسسك بالالم بجد و يمكن تخليك تدمع بس انا حالياً معلق على اغنية my immortal بتاعت evansence او amy lee بمعنى اصح بس بجد رغم انها عندي بقالها سنه , بس بجد الاغنية دي جميله و مؤثرة جداً These wounds won't seem to heal This pain is just too real There's just too much that time cannot erase When you cried I'd wipe away all of your tears When you'd scream I'd fight away all of your fears And I held your hand through all of these years But you still have All of me

كلام يحسسك بمدى الحب و العشق بجد

و ده هو ختام البوست ده , ارجو ان يكون عجبكم

و ما يكونش تقيل او رذل

بس ان شاء الله البوست الجاي هيبقى محترم و كويس اوي

و شكراً لحسن استماعكم